ಮಾಡಾಳು (kannadapost.com): ಕಳೆದ ಹಲವು ದಿನಗಳಿಂದ ಅತ್ಯಂತ ವೈಭವಯುತವಾಗಿ ಮೆರೆದು, ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಸಹಸ್ರಾರು ಭಕ್ತರಿಗೆ ದರ್ಶನ ಭಾಗ್ಯ ಕರುಣಿಸಿದ ‘ಕರ್ಪೂರ ಪ್ರಿಯೆ’, ‘ಮೂಗುತಿ ಸುಂದರಿ’ ಮಾಡಾಳು ಗ್ರಾಮದ ಮೂಲಸ್ಥಾನ ಶ್ರೀ ಸ್ವರ್ಣ ಗೌರಮ್ಮ ದೇವಿಯ ನಾಮಸ್ಮರಣೆ ಇಂದಿಗೂ ದೇವಾಲಯದ ಆವರಣದಲ್ಲಿ ಮೊಳಗುತ್ತಿದೆ. ದೇವಿ ಕೈಲಾಸ ಸೇರಿದ್ದರೂ ಭಕ್ತರ ಭಕ್ತಿಭಾವ ಮಾತ್ರ ಕಿಂಚಿತ್ತೂ ಕಡಿಮೆಯಾಗಿಲ್ಲ.
ಇದರ ಬೆನ್ನಲ್ಲೇ, ನೂತನ ದೇವಾಲಯಕ್ಕೆ ಆಗಮಿಸಿದ ಹಾರನಹಳ್ಳಿ ಸುಕ್ಷೇತ್ರ ಕೋಡಿಮಠದ ಜಗದ್ಗುರು ಡಾ. ಶಿವಾನಂದ ಶಿವಯೋಗಿ ರಾಜೇಂದ್ರ ಸ್ವಾಮೀಜಿ ಅವರು ಭಕ್ತವೃಂದವನ್ನು ಉದ್ದೇಶಿಸಿ ಮಾತನಾಡಿ, “ಇದೇ ಪ್ರಥಮ ಬಾರಿಗೆ ದೇವಾಲಯದಲ್ಲಿ ‘ದಸರಾ ಮಹೋತ್ಸವ’ವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಬೇಕು,” ಎಂದು ಕರೆ ನೀಡಿದ್ದಾರೆ.
ಅ. 10ಕ್ಕೆ ಆರಾಧ್ಯ ದೈವ ಚನ್ನಬಸವೇಶ್ವರ ಸ್ವಾಮಿ ಪಟ್ಟಾಭಿಷೇಕ:
ನಾಡಿನ ಜನರ ಒಳಿತಿಗಾಗಿ ಹಾಗೂ ಲೋಕ ಕಲ್ಯಾಣಾರ್ಥವಾಗಿ, ಆಪದ್ಬಾಂಧವ ಹಾಗೂ ಗ್ರಾಮದ ಆರಾಧ್ಯ ದೈವ ಶ್ರೀ ಗುರು ಚನ್ನಬಸವೇಶ್ವರ ಸ್ವಾಮಿಯವರನ್ನು ಅಕ್ಟೋಬರ್ 10ರ ಅಮಾವಾಸ್ಯೆಯಂದು ಪಟ್ಟಕ್ಕೆ ಕೂರಿಸಲಾಗುವುದು (ಪಟ್ಟಾಭಿಷೇಕ).
ನಂತರ ಸ್ವಾಮಿಯವರ ಸಮ್ಮುಖದಲ್ಲಿ ಪ್ರತಿನಿತ್ಯ ಡಿ.ಎಂ. ಕುರ್ಕೆ ರಾಜಶೇಖರ ಶಾಸ್ತ್ರಿಗಳವರು ‘ದೇವಿ ಪಾರಾಯಣ’ವನ್ನು ಪಠಿಸಲಿದ್ದಾರೆ. ಭಕ್ತರು ಸಕಾಲಕ್ಕೆ ಆಗಮಿಸಿ ಈ ಧಾರ್ಮಿಕ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ದೇವಿ ಕೃಪೆಗೆ ಪಾತ್ರರಾಗಬೇಕು ಎಂದು ಶ್ರೀಗಳು ನುಡಿದರು.
ಅ. 21ರಂದು ಅಂಬು ಛೇದನ (ಬನ್ನಿ ಕಡಿಯುವ ಕಾರ್ಯಕ್ರಮ):
ಕೋಡಿಮಠದಲ್ಲಿ ಅಕ್ಟೋಬರ್ 20ರಂದು ವಿಜಯದಶಮಿಯ ಪ್ರಯುಕ್ತ ಅಂಬು ಛೇದನ ನಡೆದರೆ, ಮರುದಿನ ಅಂದರೆ ಅಕ್ಟೋಬರ್ 21ರಂದು (ಬುಧವಾರ) ಮಾಡಾಳಿನಲ್ಲಿ ಮಧ್ಯಾಹ್ನ ಶ್ರೀ ಚನ್ನಬಸವೇಶ್ವರ ಸ್ವಾಮಿಯವರನ್ನು ಪುಷ್ಪಾಲಂಕೃತ ಮಂಟಪದಲ್ಲಿ ಪ್ರತಿಷ್ಠಾಪಿಸಲಾಗುವುದು. ಮಂಗಳ ಕರಡೆ ವಾದ್ಯಗಳೊಂದಿಗೆ ದೇವಾಲಯದ ಆವರಣದಲ್ಲಿ ಭಕ್ತರೊಡಗೂಡಿ ಅದ್ದೂರಿ ಉತ್ಸವ ನಡೆಸಲಾಗುವುದು. ಬಳಿಕ ದೇವಾಲಯದ ಮುಂಭಾಗ ಸಿದ್ಧತೆಗೊಳಿಸಿರುವ ಅಂಬನ್ನು ಛೇದಿಸಿ ಬನ್ನಿ ಕಡಿಯುವ (ಬನ್ನಿ ಮುಡಿಯುವ) ಕಾರ್ಯಕ್ರಮ ಸಂಪನ್ನಗೊಳ್ಳಲಿದೆ.
ಈ ಮಹತ್ವದ ಸಭೆಯಲ್ಲಿ ಕೋಡಿಮಠದ ಏಜೆಂಟ್ ಮಹದೇವಪ್ಪ, ಶ್ರೀ ಗೌರಮ್ಮ ದೇವಿ ಸೇವಾ ಸಮಿತಿ ಅಧ್ಯಕ್ಷರು, ಸದಸ್ಯರು, ಮಾಡಾಳು ಗ್ರಾಮಸ್ಥರು ಉಪಸ್ಥಿತರಿದ್ದರು. ಅಲ್ಲದೆ ವೈ.ಜಿ. ಹಳ್ಳಿ, ಪಿ. ಹೊಸಹಳ್ಳಿ, ಕಿತ್ತನಕೆರೆ, ಬೊಮ್ಮಸಮುದ್ರ, ಕೆ. ಶಂಕರನಹಳ್ಳಿ, ಕಡಲಮಗೆ, ಶಶಿವಾಳ, ಡಿ.ಎಂ. ಕುರ್ಕೆ, ಹಾರನಹಳ್ಳಿ, ಅಣ್ಣಾಯಕನಹಳ್ಳಿ ಮುಂತಾದ ಗ್ರಾಮಗಳ ಅಪಾರ ಭಕ್ತರು ಭಾಗವಹಿಸಿದ್ದರು.
