ಆಸ್ತಿ ವಿವಾದಕ್ಕೆ ತಂಗಿ ಮನೆ ಮೇಲೆ ಅಣ್ಣನ ಗ್ಯಾಂಗ್ ದಾಳಿ? ಲಾಂಗ್-ಮಚ್ಚುಗಳಿಂದ ಹಲ್ಲೆ ಆರೋಪ

ಬೆಂಗಳೂರು ಜು. 25 (www.kannadapost.com): ಆಸ್ತಿ ವಿವಾದದ ಹಿನ್ನೆಲೆಯಲ್ಲಿ ಸ್ವಂತ ಅಣ್ಣನೇ ಗ್ಯಾಂಗ್‌ನೊಂದಿಗೆ ತಂಗಿಯ ಮನೆ ಮೇಲೆ ಮಾರಕಾಸ್ತ್ರಗಳಿಂದ ದಾಳಿ ನಡೆಸಿರುವ ಗಂಭೀರ ಆರೋಪ ಬೆಂಗಳೂರಿನಲ್ಲಿ ಕೇಳಿಬಂದಿದೆ.

ನಗರದ ಬನ್ನೇರುಘಟ್ಟ ಪೊಲೀಸ್ ಠಾಣೆ ವ್ಯಾಪ್ತಿಯ ಮೈಲಸಂದ್ರ ದಿಣ್ಣೆಪಾಳ್ಯದಲ್ಲಿ ನಡೆದ ಈ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ದಾಳಿಯಲ್ಲಿ ಲಾಂಗ್ ಹಾಗೂ ಮಚ್ಚುಗಳಂತಹ ಮಾರಕಾಸ್ತ್ರಗಳನ್ನು ಬಳಸಲಾಗಿದೆ ಎಂದು ಆರೋಪಿಸಲಾಗಿದ್ದು, ಘಟನೆ ಸ್ಥಳದಲ್ಲಿ ಕೆಲಕಾಲ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು.

ದಾಳಿಗೆ ಒಳಗಾದ ದಿವ್ಯ ಹಾಗೂ ಅವರ ಪತಿ ಅರ್ಜುನ್ ರೆಡ್ಡಿ ಮಾತನಾಡಿ, ತಮ್ಮ ಅಣ್ಣ ಸುಮನ್ ರೆಡ್ಡಿ ಹಾಗೂ ಅವರೊಂದಿಗೆ ಬಂದಿದ್ದ ಗ್ಯಾಂಗ್ ಈ ಕೃತ್ಯ ಎಸಗಿದೆ ಎಂದು ಆರೋಪಿಸಿದ್ದಾರೆ.

ಎರಡು ವರ್ಷಗಳಿಂದ ಆಸ್ತಿ ವಿವಾದ

ಕುಟುಂಬದ ಆಸ್ತಿ ಹಂಚಿಕೆ ವಿಚಾರವಾಗಿ ಕಳೆದ ಎರಡು ವರ್ಷಗಳಿಂದ ಸುಮನ್ ರೆಡ್ಡಿ ಮತ್ತು ದಿವ್ಯ ನಡುವೆ ಭಿನ್ನಾಭಿಪ್ರಾಯ ಮುಂದುವರಿದಿತ್ತು ಎನ್ನಲಾಗಿದೆ.

ಹಕ್ಕು ಬಿಡುಗಡೆ ಪತ್ರಕ್ಕೆ (Release Deed) ಸಹಿ ಹಾಕುವಂತೆ ಪದೇ ಪದೇ ಒತ್ತಡ ಹೇರಲಾಗುತ್ತಿತ್ತು. ಆದರೆ, ತಾನು ಸಹಿ ಹಾಕಲು ನಿರಾಕರಿಸಿದ್ದರಿಂದ ಈ ದಾಳಿ ನಡೆದಿದೆ ಎಂದು ದಿವ್ಯ ಆರೋಪಿಸಿದ್ದಾರೆ.

“ನನಗೆ ತಂದೆಯ ಆಸ್ತಿಯಲ್ಲಿ ಪಾಲು ಬೇಡ. ನಮ್ಮ ಕುಟುಂಬವನ್ನು ನೆಮ್ಮದಿಯಾಗಿ ಬದುಕಲು ಬಿಡಿ” ಎಂದು ಮನವಿ ಮಾಡಿಕೊಂಡಿದ್ದರೂ ಬೆದರಿಕೆ ಮುಂದುವರಿದಿತ್ತು ಎಂದು ಅವರು ಹೇಳಿದ್ದಾರೆ.

ರಾತ್ರಿ ಮನೆ ಮೇಲೆ ದಾಳಿ

ಆರೋಪದ ಪ್ರಕಾರ, ನಿನ್ನೆ ರಾತ್ರಿ ಸುಮನ್ ರೆಡ್ಡಿ ಎಂಡವರ್ ಕಾರಿನಲ್ಲಿ ಮೂವರು ಯುವಕರೊಂದಿಗೆ ಮನೆಗೆ ಆಗಮಿಸಿದ್ದು, ಲಾಂಗ್ ಹಾಗೂ ಮಚ್ಚು ಹಿಡಿದು ಮನೆ ಮೇಲೆ ದಾಳಿ ನಡೆಸಿದ್ದಾರೆ.

ಅರ್ಜುನ್ ರೆಡ್ಡಿಯನ್ನು ಹುಡುಕಿಕೊಂಡು ಬಂದಿದ್ದ ಆರೋಪಿಗಳು ಅವರು ಸಿಗದಿದ್ದಾಗ ಮನೆಯ ಮೇಲೆಯೇ ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ.

ಈ ವೇಳೆ ಅಡ್ಡ ಬಂದಿದ್ದ ಪಕ್ಕದ ಅಂಗಡಿಯ ವ್ಯಕ್ತಿಯ ಮೇಲೂ ಹಲ್ಲೆ ನಡೆಸಿ, ಮಚ್ಚಿನಿಂದ ಕಾಲಿಗೆ ಗಾಯಪಡಿಸಿದ್ದಾರೆ ಎಂದು ಆರೋಪಿಸಲಾಗಿದೆ.

ದಾರಿ ಹೋಕರ ಮೇಲೂ ಹಲ್ಲೆ ಆರೋಪ

ದಾಳಿ ವೇಳೆ ದಾರಿಹೋಕರ ಮೇಲೂ ಗ್ಯಾಂಗ್ ಹಲ್ಲೆ ನಡೆಸಿದ್ದು, ಕೆಲವರ ಮೊಬೈಲ್‌ಗಳನ್ನು ಕಸಿದುಕೊಂಡು ಪರಾರಿಯಾಗಿದೆ ಎಂಬ ಆರೋಪ ಕೇಳಿಬಂದಿದೆ.

ಕುಟುಂಬಕ್ಕೆ ರಕ್ಷಣೆ ನೀಡುವಂತೆ ಮನವಿ

ಘಟನೆ ಬಳಿಕ ದಿವ್ಯ, ತಮ್ಮ ಪತಿ ಅರ್ಜುನ್ ರೆಡ್ಡಿ ಹಾಗೂ ಕುಟುಂಬದ ಜೀವಕ್ಕೆ ಅಪಾಯವಿದ್ದು, ಆರೋಪಿಗಳನ್ನು ಕೂಡಲೇ ಬಂಧಿಸಿ ಸೂಕ್ತ ರಕ್ಷಣೆ ನೀಡುವಂತೆ ಪೊಲೀಸರಲ್ಲಿ ಮನವಿ ಮಾಡಿದ್ದಾರೆ.

ಪ್ರಕರಣ ಸಂಬಂಧ ಬನ್ನೇರುಘಟ್ಟ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

News Highlights

• ಆಸ್ತಿ ವಿವಾದಕ್ಕೆ ತಂಗಿಯ ಮನೆ ಮೇಲೆ ಅಣ್ಣನ ಗ್ಯಾಂಗ್ ದಾಳಿ ಆರೋಪ
• ಲಾಂಗ್, ಮಚ್ಚು ಹಿಡಿದು ಮನೆ ಮೇಲೆ ಅಟ್ಯಾಕ್ ಮಾಡಿದ ಆರೋಪ
• ಹಕ್ಕು ಬಿಡುಗಡೆ ಪತ್ರಕ್ಕೆ ಸಹಿ ಹಾಕುವಂತೆ ಒತ್ತಡ ಆರೋಪ
• ದಾರಿಹೋಕರ ಮೇಲೂ ಹಲ್ಲೆ, ಮೊಬೈಲ್ ಕಸಿದುಕೊಂಡ ಆರೋಪ
• ಕುಟುಂಬಕ್ಕೆ ರಕ್ಷಣೆ ನೀಡುವಂತೆ ಪೊಲೀಸರಿಗೆ ಮನವಿ
• ಬನ್ನೇರುಘಟ್ಟ ಪೊಲೀಸರು ತನಿಖೆ ಆರಂಭ