ಹಾಸನ: ಗಣೇಶ ಚತುರ್ಥಿ ಪ್ರಯುಕ್ತ ಸ್ಕಾಲರ್ಸ್ ಇಂಟರ್ನ್ಯಾಷನಲ್ ಸ್ಕೂಲ್ನಲ್ಲಿ ಪ್ರತಿಷ್ಠಾಪಿಸಿದ್ದ ಗಣೇಶ ಮೂರ್ತಿ ವಿಸರ್ಜನೆ ಕಾರ್ಯಕ್ರಮವನ್ನು ಭಕ್ತಿಭಾವ ಹಾಗೂ ಸಾಂಸ್ಕೃತಿಕ ಝಲಕ್ ನೊಂದಿಗೆ ಅದ್ಧೂರಿಯಾಗಿ ನಡೆಯಿತು.
ಶಾಲೆಯ ಆವರಣದಲ್ಲಿ ಅಲಂಕರಿಸಿದ ಗಣೇಶ ವಿಗ್ರಹಕ್ಕೆ ಹೂವು, ಹಣ್ಣು ಹಾಗೂ ನೈವೇದ್ಯ ಸಮರ್ಪಿಸಿ ಪೂಜೆ ಸಲ್ಲಿಸಲಾಯಿತು. ವಿದ್ಯಾರ್ಥಿಗಳ ಸಮೂಹಗಾನದಲ್ಲಿ ಗಣಪತಿ ಸ್ತುತಿಗೀತೆಗಳು ಮೊಳಗಿದಾಗ ಪೂರ್ತಿ ಆವರಣವೇ ಭಕ್ತಿಮಯ ವಾತಾವರಣದಿಂದ ಕೂಡಿತ್ತು. ವಿದ್ಯಾರ್ಥಿಗಳು ತಯಾರಿಸಿದ ಹೂವಿನ ಅಲಂಕಾರ ಗಣಪತಿಯ ಸಾನ್ನಿಧ್ಯವನ್ನು ವೈಭವಯುತವನ್ನಾಗಿಸಿತು.
ವಿದ್ಯಾರ್ಥಿಗಳ ಸಾಂಸ್ಕೃತಿಕ ನೃತ್ಯಪ್ರದರ್ಶನವು ಕಾರ್ಯಕ್ರಮದ ಪ್ರಮುಖ ಆಕರ್ಷಣೆ ಆಗಿದ್ದು, ವಿವಿಧ ತರಗತಿಯ ಮಕ್ಕಳು ಗಣಪತಿ ಭಜನೆಗಳಿಗೆ ಹೊಂದಿಕೊಂಡು ಸಾಂಪ್ರದಾಯಿಕ ಮತ್ತು ಆಧುನಿಕ ಶೈಲಿಯ ನೃತ್ಯಗಳನ್ನು ಪ್ರದರ್ಶಿಸಿದರು. ಕಿರಿಯ ಮಕ್ಕಳ “ಮೂಷಿಕ ವಾಹನ” ನೃತ್ಯ ಎಲ್ಲರ ಮನಸೂರೆಗೊಂಡರೆ, ಹಿರಿಯ ವಿದ್ಯಾರ್ಥಿಗಳು ಭಾವಪೂರ್ಣ ನೃತ್ಯಗಳ ಮೂಲಕ ಗಣಪತಿಯ ಶಕ್ತಿಸ್ವರೂಪವನ್ನು ಪ್ರತಿಬಿಂಬಿಸಿದರು.
ಶಾಲಾ ಆವರಣದಿಂದ ಗಣೇಶ ವಿಸರ್ಜನೆ ಮೆರವಣಿಗೆ ಬಾವುಟಗಳು, ಹೂವಿನ ಹರಕೆಗಳು, ಭಜನೆಗಳೊಂದಿಗೆ ಆರಂಭವಾಯಿತು. ವಿದ್ಯಾರ್ಥಿಗಳು ಶಿಸ್ತಿನಿಂದ ಮೆರವಣಿಗೆಯಲ್ಲಿ ಸಾಗಿದರು. ಕೈತಾಳಮದ್ದಲೆ, ಡೊಳ್ಳು, ಚಂಡೆ ಬಾರಿಸಿದ ವಿದ್ಯಾರ್ಥಿಗಳು ಉತ್ಸವದ ಸಂಭ್ರಮವನ್ನು ಹೆಚ್ಚಿಸಿದರು. “ಗಣಪತಿ ಬಪ್ಪಾ ಮೋರೆಯಾ” ಘೋಷಣೆ ಕೂಗಿದಾಗ ವಾತಾವರಣವೇ ಉತ್ಸಾಹದಿಂದ ತುಂಬಿತು.
ವಿಸರ್ಜನೆಗಾಗಿ ಸಿದ್ಧಪಡಿಸಿದ ಕೆರೆಯಲ್ಲಿ ಗಣಪತಿಯನ್ನು ಸಾಗಿಸುವ ಸಂದರ್ಭದಲ್ಲಿ ಹೂವು, ಕುಂಕುಮ ಮತ್ತು ಹಣ್ಣುಗಳಿಂದ ವಂದನೆ ಸಲ್ಲಿಸಲಾಯಿತು. ನೀರಿನಲ್ಲಿ ವಿಗ್ರಹವನ್ನು ಮುಳುಗಿಸುವಾಗ ವಿದ್ಯಾರ್ಥಿಗಳು “ಮುಂದಿನ ವರ್ಷ ಮತ್ತೆ ಬಾ” ಎಂದು ಪ್ರಾರ್ಥನೆ ಸಲ್ಲಿಸಿದರು. ಆ ಕ್ಷಣದಲ್ಲಿ ಅನೇಕ ಮಕ್ಕಳ ಕಣ್ಣುಗಳಲ್ಲಿ ಭಕ್ತಿಯ ಕಣ್ಣೀರು ಜಿನುಗಿತು.
ಕಾರ್ಯಕ್ರಮದಲ್ಲಿ ಸಂಸ್ಥೆಯ ಆಡಳಿತಾಧಿಕಾರಿ ಡಾ. ಎಚ್. ಎನ್. ಚಂದ್ರಶೇಖರ್ ಮಾತನಾಡಿ, “ಗಣಪತಿ ಹಬ್ಬವು ನಮ್ಮ ಸಂಸ್ಕೃತಿಯ ಜೀವಾಳ. ಇದು ಮಕ್ಕಳಲ್ಲಿ ಭಕ್ತಿ, ಶಿಸ್ತು ಹಾಗೂ ಒಗ್ಗಟ್ಟಿನ ಮೌಲ್ಯಗಳನ್ನು ಬೆಳೆಸುತ್ತದೆ. ಇಂತಹ ಕಾರ್ಯಕ್ರಮಗಳು ವಿದ್ಯಾರ್ಥಿಗಳ ಪ್ರತಿಭೆ ಬೆಳೆಸುವ ವೇದಿಕೆ” ಎಂದು ಹೇಳಿದರು.
ಶಾಲೆಯ ಆಡಳಿತ ಮಂಡಳಿ ಕಾರ್ಯದರ್ಶಿ ಶ್ರೀಮತಿ ಮಮತಾ ಅವರು ವಿದ್ಯಾರ್ಥಿಗಳ ನೃತ್ಯಪ್ರದರ್ಶನವನ್ನು ಮೆಚ್ಚಿ, “ನಿಮ್ಮಲ್ಲಿರುವ ಕಲಾತ್ಮಕ ಶಕ್ತಿ, ಶಿಸ್ತಿನಿಂದ ಕೂಡಿದ ಪ್ರದರ್ಶನ ಹಾಗೂ ಸಮನ್ವಯವು ಶಾಲೆಯ ಹೆಮ್ಮೆಯಾಗಿದೆ” ಎಂದು ಪ್ರಶಂಸಿಸಿದರು.
ಶಾಲೆಯ ಉಪಪ್ರಾಂಶುಪಾಲ ಆ್ಯಂಟನಿ ಅವರು ವಿದ್ಯಾರ್ಥಿಗಳ ಪರಿಶ್ರಮವನ್ನು ಮೆಚ್ಚಿ, “ಗಣಪತಿ ಹಬ್ಬವು ಕೇವಲ ಧಾರ್ಮಿಕ ಆಚರಣೆ ಮಾತ್ರವಲ್ಲ; ಇದು ಪರಿಸರ ಸಂರಕ್ಷಣೆ, ಒಗ್ಗಟ್ಟು ಹಾಗೂ ಕಲೆಯ ಪಾಠವನ್ನೂ ಕಲಿಸುತ್ತದೆ. ಈ ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳ ಶ್ರದ್ಧೆ ಮತ್ತು ಸೃಜನಶೀಲತೆ ಸ್ಕಾಲರ್ಸ್ ಇಂಟರ್ನ್ಯಾಷನಲ್ ಸ್ಕೂಲ್ನ ಹೆಗ್ಗಳಿಕೆಯನ್ನು ಹೆಚ್ಚಿಸಿದೆ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಕಾರ್ಯಕ್ರಮವು ನೃತ್ಯ, ಭಕ್ತಿ, ಸಂಭ್ರಮ ಮತ್ತು ಶ್ರದ್ಧೆಯ ಸಂಯೋಜನೆಯಾಗಿ ಸ್ಮರಣೀಯವಾಯಿತು. ವಿದ್ಯಾರ್ಥಿಗಳ ಸೃಜನಶೀಲತೆ, ಸಮರ್ಪಣೆ ಹಾಗೂ ಉತ್ಸಾಹದಿಂದ ಗಣೇಶ ವಿಸರ್ಜನೆ ಯಶಸ್ವಿಯಾಗಿ ನೆರವೇರಿತು
