ಎರಡು ದಶಕಗಳಿಂದ ಗೊಂಬೆ ಕೂರಿಸುವ ಸಂಪ್ರದಾಯ; ಶ್ರೀಕೃಷ್ಣ ಜನ್ಮಾಷ್ಟಮಿಯಿಂದ ದಶಾವತಾರದವರೆಗೆ ವೈವಿಧ್ಯಮಯ ಪ್ರದರ್ಶನ
ಅರಸೀಕೆರೆ ,ಅಕ್ಟೋಬರ್‌,16,2026 (kannadapost.com): ನವರಾತ್ರಿ ದಸರಾ ಹಬ್ಬವೆಂದರೆ ನಾಡಿನ ಜನರಿಗೆ, ಅದರಲ್ಲೂ ವಿಶೇಷವಾಗಿ ಮಹಿಳೆಯರಿಗೆ ಸಡಗರ, ಸಂಭ್ರಮ ಮತ್ತು ಸಂತೋಷದ ಸಮಯ. ಒಂಬತ್ತು ದಿನಗಳ ಕಾಲ ಶಕ್ತಿ ದೇವತೆ ಚಾಮುಂಡೇಶ್ವರಿ ಸೇರಿದಂತೆ ದೇವಿಯರನ್ನು ಭಕ್ತಿಪೂರ್ವಕವಾಗಿ ಆರಾಧಿಸುವ ಈ ಹಬ್ಬದಲ್ಲಿ ಗೊಂಬೆ ಕೂರಿಸುವ ಸಂಪ್ರದಾಯವೂ ವಿಶೇಷ ಸ್ಥಾನ ಪಡೆದಿದೆ. ಅರಸೀಕೆರೆಯ ಮಾರುತಿ ನಗರ ಬಡಾವಣೆಯ ನಿವಾಸಿ ಶಕುಂತಲಾ ಆನಂದ್ ಅವರು ಕಳೆದ ಎರಡು ದಶಕಗಳಿಂದ ಈ ಸಂಪ್ರದಾಯವನ್ನು ನಿರಂತರವಾಗಿ ಮುಂದುವರಿಸಿಕೊಂಡು ಬರುತ್ತಿದ್ದಾರೆ.
ಇಳಿ ವಯಸ್ಸಿನಲ್ಲಿಯೂ ಉತ್ಸಾಹದಿಂದ ಗೊಂಬೆಗಳನ್ನು ಜೋಡಿಸಿ ಪ್ರದರ್ಶನಕ್ಕೆ ಇಡುವ ಶಕುಂತಲಾ ಆನಂದ್ ಅವರು, ಈ ಬಾರಿಯೂ ತಮ್ಮ ಮನೆಯಲ್ಲಿ 500ಕ್ಕೂ ಹೆಚ್ಚು ಗೊಂಬೆಗಳನ್ನು ಕೂರಿಸಿ ನವರಾತ್ರಿ ಹಬ್ಬಕ್ಕೆ ವಿಶೇಷ ಮೆರುಗು ನೀಡಿದ್ದಾರೆ.
ಪೌರಾಣಿಕ ಪ್ರಸಂಗಗಳಿಂದ ದಶಾವತಾರದವರೆಗೆ
ಶಕುಂತಲಾ ಆನಂದ್ ಅವರ ಗೊಂಬೆಗಳ ಪ್ರದರ್ಶನದಲ್ಲಿ ಶ್ರೀಕೃಷ್ಣ ಜನ್ಮಾಷ್ಟಮಿ, ಶ್ರೀರಾಮ–ಸೀತೆಯರ ವಿವಾಹ, ಲಕ್ಷ್ಮಣ, ರಾಮಭಕ್ತ ಆಂಜನೇಯ, ದಶಾವತಾರ, ಅಷ್ಟಲಕ್ಷ್ಮಿಯರು, ಕಾಳಿಂಗಮರ್ಧನ ಹಾಗೂ ವೀಣೆ ನುಡಿಸುತ್ತಿರುವ ಶಾರದಾದೇವಿಯ ಮೂರ್ತಿಗಳು ಪ್ರಮುಖ ಆಕರ್ಷಣೆಯಾಗಿವೆ. ಪೌರಾಣಿಕ ಕಥನಗಳು, ದೈವಭಕ್ತಿ ಮತ್ತು ಭಾರತೀಯ ಸಂಸ್ಕೃತಿಯನ್ನು ಬಿಂಬಿಸುವ ಈ ಗೊಂಬೆಗಳ ಸಾಲು ನೋಡುಗರ ಕಣ್ಮನ ಸೆಳೆಯುತ್ತಿದೆ.
ವರ್ಷವಿಡೀ ಬೀರುವಿನಲ್ಲಿ ಜೋಪಾನವಾಗಿ ಸಂಗ್ರಹಿಸಿಟ್ಟಿರುವ ಗೊಂಬೆಗಳನ್ನು ದಸರಾ ಸಂದರ್ಭದಲ್ಲಿ ಹೊರತೆಗೆದು, ವಿಶೇಷ ವೇದಿಕೆ ನಿರ್ಮಿಸಿ ಮೆಟ್ಟಿಲುಗಳ ಮೇಲೆ ಸಾಲುಸಾಲಾಗಿ ಜೋಡಿಸುವುದು ಈ ಸಂಪ್ರದಾಯದ ವೈಶಿಷ್ಟ್ಯವಾಗಿದೆ. ಗೊಂಬೆಗಳನ್ನು ಕೂರಿಸುವ ತಯಾರಿ, ಅಲಂಕಾರ ಮತ್ತು ಪ್ರದರ್ಶನದ ಕುರಿತು ಅಕ್ಕಪಕ್ಕದ ಮನೆಯವರೊಂದಿಗೆ ಚರ್ಚಿಸುವುದೂ ಮಹಿಳೆಯರಿಗೆ ಹಬ್ಬದ ಸಂಭ್ರಮವನ್ನು ಹೆಚ್ಚಿಸುತ್ತದೆ.
ಒಂಬತ್ತು ದಿನವೂ ಪೂಜೆ, ಸುಮಂಗಲಿಯರಿಗೆ ಕುಂಕುಮ
ನವರಾತ್ರಿಯ ಒಂಬತ್ತು ದಿನಗಳ ಕಾಲ ಪ್ರತಿದಿನ ತ್ರಿಕಾಲ ಪೂಜೆ ಸಲ್ಲಿಸುವ ಶಕುಂತಲಾ ಆನಂದ್ ಅವರು, ಸಂಜೆ ವೇಳೆ ಅಕ್ಕಪಕ್ಕದ ಮನೆಗಳ ಸುಮಂಗಲಿಯರನ್ನು ಆಹ್ವಾನಿಸಿ ಸಿಹಿ ಹಂಚಿ, ಅರಿಶಿನ–ಕುಂಕುಮ ನೀಡುವ ಸಂಪ್ರದಾಯವನ್ನೂ ಪಾಲಿಸಿಕೊಂಡು ಬರುತ್ತಿದ್ದಾರೆ. ಇದರಿಂದ ಧಾರ್ಮಿಕ ಆಚರಣೆಯ ಜೊತೆಗೆ ನೆರೆಹೊರೆಯವರ ನಡುವಿನ ಆತ್ಮೀಯತೆ ಮತ್ತು ಸೌಹಾರ್ದವೂ ವೃದ್ಧಿಯಾಗುತ್ತಿದೆ.
ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವ ಅಗತ್ಯ
ಮೈಸೂರು ದಸರಾ ಎಂದಾಗ ರಾಜಮಹಾರಾಜರ ಆಳ್ವಿಕೆ, ಅರಮನೆಯ ವೈಭವ ಮತ್ತು ನಾಡಿನ ಸಾಂಸ್ಕೃತಿಕ ಪರಂಪರೆ ನೆನಪಾಗುತ್ತದೆ. ಅದೇ ರೀತಿ ಮನೆಮನೆಗಳಲ್ಲಿ ನಡೆಯುವ ಗೊಂಬೆ ಕೂರಿಸುವ ಆಚರಣೆಯೂ ನಮ್ಮ ಸಂಸ್ಕೃತಿಯ ಶ್ರೀಮಂತಿಕೆಯನ್ನು ಪ್ರತಿಬಿಂಬಿಸುತ್ತದೆ.
ಮಾಧ್ಯಮದವರೊಂದಿಗೆ ಮಾತನಾಡಿದ ಶಕುಂತಲಾ ಆನಂದ್ ಅವರು, ಆಧುನಿಕತೆಯ ಪ್ರಭಾವದಿಂದ ಸಾಂಪ್ರದಾಯಿಕ ಆಚರಣೆಗಳು ಮರೆಯಾಗುತ್ತಿರುವ ಈ ಸಂದರ್ಭದಲ್ಲಿ ನಮ್ಮ ಸಂಸ್ಕೃತಿ ಮತ್ತು ಪರಂಪರೆಯನ್ನು ಉಳಿಸಿ ಬೆಳೆಸುವ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟರು.
ಒಟ್ಟಿನಲ್ಲಿ, ಅರಸೀಕೆರೆಯ ಶಕುಂತಲಾ ಆನಂದ್ ಅವರ ಮನೆಯ 500ಕ್ಕೂ ಹೆಚ್ಚು ಗೊಂಬೆಗಳ ಪ್ರದರ್ಶನವು ಕೇವಲ ಧಾರ್ಮಿಕ ಆಚರಣೆಯಾಗಿರದೆ, ಮುಂದಿನ ಪೀಳಿಗೆಗೆ ನಮ್ಮ ಸಂಸ್ಕೃತಿ, ಪೌರಾಣಿಕ ಪರಂಪರೆ ಮತ್ತು ಕುಟುಂಬದ ಸಂಪ್ರದಾಯಗಳನ್ನು ಪರಿಚಯಿಸುವ ಸಾಂಸ್ಕೃತಿಕ ಪ್ರಯತ್ನವೂ ಆಗಿದೆ.
ಕನ್ನಡಪೋಸ್ಟ್ — ಇದು ಸುದ್ದಿ ವಿಳಾಸ!
