2026ರ ಹಾಸನಾಂಬಾ ದೇವಾಲಯದ ದರ್ಶನೋತ್ಸವ ಯಶಸ್ವಿ. 12 ದಿನಗಳಲ್ಲಿ 30 ಲಕ್ಷಕ್ಕೂ ಅಧಿಕ ಭಕ್ತರಿಂದ ದರ್ಶನ. ಒಟ್ಟು ₹29.55 ಕೋಟಿ ಆದಾಯ ಹಾಗೂ ಚಿನ್ನ-ಬೆಳ್ಳಿ ಕಾಣಿಕೆ ವಿವರ ಇಲ್ಲಿದೆ
ಹಾಸನ(kannadapost.com): ಪ್ರಸಿದ್ಧ ಐತಿಹಾಸಿಕ ಶ್ರೀ ಹಾಸನಾಂಬಾ ದೇವಾಲಯದ ಈ ಬಾರಿಯ ದರ್ಶನೋತ್ಸವವು ಭಕ್ತಸಾಗರದ ನಡುವೆ ಅತ್ಯಂತ ಯಶಸ್ವಿಯಾಗಿ ಸಂಪೂರ್ಣಗೊಂಡಿದ್ದು, ದೇವಾಲಯದ ಆಡಳಿತ ಮಂಡಳಿಯು ಅಧಿಕೃತ ಆದಾಯದ ವಿವರಗಳನ್ನು ಬಿಡುಗಡೆ ಮಾಡಿದೆ. ಕಳೆದ ವರ್ಷಕ್ಕಿಂತ ಈ ಬಾರಿ ಭಕ್ತರ ಸಂಖ್ಯೆ ಹಾಗೂ ಆದಾಯದಲ್ಲಿ ಗಣನೀಯ ಏರಿಕೆಯಾಗಿದೆ.
ದೇವಾಲಯದ ಆಡಳಿತಾಧಿಕಾರಿ ಹಾಗೂ ಉಪವಿಭಾಗಾಧಿಕಾರಿ ಜಗದೀಶ್ ಗಂಗಣ್ಣನವರ್ ಮಾಧ್ಯಮಗಳಿಗೆ ಈ ಕುರಿತು ಮಾಹಿತಿ ನೀಡಿದ್ದು, 2026ರ ಅಕ್ಟೋಬರ್ 29ರಂದು ಗರ್ಭಗುಡಿ ಬಾಗಿಲು ತೆರೆಯಲಾಗಿತ್ತು ಎಂದು ತಿಳಿಸಿದರು. ಅಂದು ಸಾರ್ವಜನಿಕರಿಗೆ ನೇರ ದರ್ಶನಾವಕಾಶವಿಲ್ಲದಿದ್ದರೂ, ಆಗಮಿಸಿದ್ದ ಕೆಲ ವಿಶೇಷ ಆಹ್ವಾನಿತರು ಹಾಗೂ ಭಕ್ತರಿಗೆ ದೇವಿಯ ದರ್ಶನ ಪಡೆಯಲು ಅವಕಾಶ ಕಲ್ಪಿಸಲಾಗಿತ್ತು. ಆ ದಿನ ಒಂದೇ ದಿನ ಬಸು 5,600 ಮಂದಿ ಭಕ್ತರು ದರ್ಶನ ಪಡೆದಿದ್ದರು.
ದಾಖಲೆ ಬರೆದ ಭಕ್ತರ ಆಗಮನ: 30 ಲಕ್ಷಕ್ಕೂ ಹೆಚ್ಚು ಭಕ್ತರಿಂದ ದರ್ಶನ
2026ರ ಅಕ್ಟೋಬರ್ 30ರಿಂದ ನವೆಂಬರ್ 10ರವರೆಗೆ ಒಟ್ಟು 12 ದಿನಗಳ ಕಾಲ ಸಾರ್ವಜನಿಕರಿಗೆ ಮುಕ್ತ ಅವಕಾಶ ಕಲ್ಪಿಸಲಾಗಿತ್ತು. ಈ ಅವಧಿಯಲ್ಲಿ ಹಾಸನ ಜಿಲ್ಲೆ ಸೇರಿದಂತೆ ರಾಜ್ಯದ ಮೂಲೆ ಮೂಲೆಗಳಿಂದ ಹಾಗೂ ಹೊರ ರಾಜ್ಯಗಳಿಂದಲೂ ಲಕ್ಷಾಂತರ ಭಕ್ತರು ಹರಿದುಬಂದಿದ್ದರು. ಒಟ್ಟು 30 ಲಕ್ಷದ 6,000 ಭಕ್ತರು ತಾಯಿ ಹಾಸನಾಂಬೆಯ ದರ್ಶನ ಪಡೆದು ಧನ್ಯರಾಗಿದ್ದಾರೆ.
ಹೋಲಿಕೆ ಮಾಡಿ ನೋಡುವುದಾದರೆ, ಕಳೆದ 2025ರಲ್ಲಿ 13 ದಿನಗಳಲ್ಲಿ ಒಟ್ಟು 25 ಲಕ್ಷ 36 ಭಕ್ತರು ಮಾತ್ರ ದರ್ಶನ ಪಡೆದಿದ್ದರು. ಆದರೆ ಈ ಬಾರಿ ದಿನಗಳು ಕಡಿಳಿದ್ದರೂ (12 ದಿನ) ಭಕ್ತರ ಸಂಖ್ಯೆಯಲ್ಲಿ ಭರ್ಜರಿ ಹೆಚ್ಚಳ ಕಂಡುಬಂದಿದೆ.
ಹುಂಡಿ ಎಣಿಕೆ ಹಾಗೂ ಒಟ್ಟು ಆದಾಯದ ಸಂಪೂರ್ಣ ವಿವರ
ಶ್ರೀ ಹಾಸನಾಂಬ ದೇವಿ ಹಾಗೂ ಶ್ರೀ ಸಿದ್ದೇಶ್ವರಸ್ವಾಮಿ ದೇವಾಲಯದ ಹುಂಡಿ ಎಣಿಕೆ ಕಾರ್ಯ ಮುಕ್ತಾಯಗೊಂಡಿದ್ದು, ಈ ಬಾರಿಯ ಒಟ್ಟು ಆದಾಯದ ಕೋಟಿಗಳ ಲೆಕ್ಕಾಚಾರ ಹೊರಬಿದ್ದಿದೆ:
- ₹1000 ವಿಶೇಷ ದರ್ಶನ ಟಿಕೆಟ್ ಮಾರಾಟದಿಂದ: ₹16,98,11,257
- ₹300 ವಿಶೇಷ ದರ್ಶನ ಟಿಕೆಟ್ ಮಾರಾಟದಿಂದ: ₹7,24,14,000
- ಲಾಡು ಪ್ರಸಾದ ಮಾರಾಟದಿಂದ: ₹1,35,99,156
- ದೇಣಿಗೆಯಾಗಿ ಬಂದ ಮೊತ್ತ: ₹5,91,228
- ಇ-ಹುಂಡಿ (E-Hundi) ಮೂಲಕ: ₹13,13,264
- ಜಾಹೀರಾತಿನಿಂದ ಬಂದ ಆದಾಯ: ₹5,74,000
- ಹುಂಡಿ ಕಾಣಿಕೆ (ನಗದು): ₹3,71,63,933
- ಶ್ರೀ ಸಿದ್ದೇಶ್ವರಸ್ವಾಮಿ ದೇವಾಲಯದ ಹುಂಡಿ ಸಂಗ್ರಹ: ₹18,99,100
ಒಟ್ಟು ದೇವಾಲಯದ ಸಂಗ್ರಹ: ₹25,82,88,199
ಹುಂಡಿ ಕಾಣಿಕೆ ಸೇರಿದಂತೆ ಒಟ್ಟು ಆದಾಯ: ₹29,55,27,852 (ಸುಮಾರು ₹29.55 ಕೋಟಿ)
ಕಳೆದ 2025ರಲ್ಲಿ ವಿಶೇಷ ದರ್ಶನ ಟಿಕೆಟ್‌ಗಳು, ಲಾಡು ಪ್ರಸಾದ ಹಾಗೂ ಹುಂಡಿ ಕಾಣಿಕೆ ಸೇರಿ ಒಟ್ಟು ₹25 ಕೋಟಿ 59 ಲಕ್ಷ ರೂ. ಸಂಗ್ರಹವಾಗಿತ್ತು. ಆದರೆ ಈ ಬಾರಿ ಎಲ್ಲಾ ಮೂಲಗಳಿಂದ ಒಟ್ಟು ₹29.55 ಕೋಟಿ ಆದಾಯ ಸಂಗ್ರಹವಾಗಿದ್ದು, ಕಳೆದ ವರ್ಷಕ್ಕಿಂತ ಬರೋಬ್ಬರಿ ₹4 ಕೋಟಿಗೂ ಅಧಿಕ ಆದಾಯ ಹೆಚ್ಚಳವಾಗಿದೆ.
ಚಿನ್ನ ಮತ್ತು ಬೆಳ್ಳಿ ಕಾಣಿಕೆ
ನಗದು ಹಣದ ಜೊತೆಗೆ ಭಕ್ತರು ಮುಕ್ತ ಮನಸ್ಸಿನಿಂದ ಚಿನ್ನ ಹಾಗೂ ಬೆಳ್ಳಿಯನ್ನು ಕಾಣಿಕೆಯಾಗಿ ಸಮರ್ಪಿಸಿದ್ದಾರೆ. ಈ ಬಾರಿ 43 ಗ್ರಾಂ 170 ಮಿಲಿಗ್ರಾಂ ಚಿನ್ನ ಹಾಗೂ 1 ಕೆಜಿ 255 ಗ್ರಾಂ 300 ಮಿಲಿಗ್ರಾಂ ಬೆಳ್ಳಿಯನ್ನು ಭಕ್ತರು ದೇವಿಗೆ ಕಾಣಿಕೆಯಾಗಿ ನೀಡಿದ್ದಾರೆ.
