ಹಾಸನ (kannadapost.com): ವರ್ಷಕ್ಕೊಮ್ಮೆ ಮಾತ್ರ ಭಕ್ತರಿಗೆ ದರ್ಶನ ನೀಡುವ ನಾಡಿನ ಪ್ರಸಿದ್ಧ ಶಕ್ತಿದೇವತೆ ಶ್ರೀ ಹಾಸನಾಂಬ ದೇವಿ ದರ್ಶನ ಹಾಗೂ ಶ್ರೀ ಸಿದ್ದೇಶ್ವರಸ್ವಾಮಿ ದೇವಾಲಯದ ಜಾತ್ರಾ ಮಹೋತ್ಸವಕ್ಕೆ ಭಕ್ತಸಾಗರವೇ ಹರಿದುಬರುತ್ತಿದೆ. ದಿನದಿಂದ ದಿನಕ್ಕೆ ಭಕ್ತರ ಸಂಖ್ಯೆ ಹೆಚ್ಚುತ್ತಿರುವ ಬೆನ್ನಲ್ಲೇ, ದೇವಾಲಯದ ಆದಾಯದಲ್ಲೂ ಭಾರೀ ಏರಿಕೆ ಕಂಡುಬಂದಿದೆ.
ಅಕ್ಟೋಬರ್ 29 ರಿಂದ ನವೆಂಬರ್ 3 ರ ಮಧ್ಯಾಹ್ನ 1.30 ರವರೆಗೆ ಕೌಂಟರ್‌ಗಳಲ್ಲಿ (Physical Tickets) ಮಾರಾಟವಾದ ವಿಶೇಷ ದರ್ಶನದ ಟಿಕೆಟ್‌ಗಳು ಹಾಗೂ ಲಾಡು ಪ್ರಸಾದದಿಂದಲೇ ಬರೋಬ್ಬರಿ 5,72,92,720 ರೂ. (5.72 ಕೋಟಿ ರೂ.) ಆದಾಯ ಸಂಗ್ರಹವಾಗಿದೆ ಎಂದು ದೇವಾಲಯದ ಆಡಳಿತ ಮಂಡಳಿ ಮಾಹಿತಿ ನೀಡಿದೆ.
1000 ರೂ. ಟಿಕೆಟ್‌ನಿಂದಲೇ ಗರಿಷ್ಠ ಆದಾಯ!
ವಿಶೇಷ ನೇರ ದರ್ಶನದ ಟಿಕೆಟ್‌ಗಳಿಗೆ ಭಕ್ತರಿಂದ ಭಾರೀ ಬೇಡಿಕೆ ವ್ಯಕ್ತವಾಗಿದೆ. ಅದರಲ್ಲೂ 1,000 ರೂ. ಮುಖಬೆಲೆಯ ಟಿಕೆಟ್ ಮಾರಾಟದಿಂದಲೇ ಅತಿ ಹೆಚ್ಚು ಅಂದರೆ 3.17 ಕೋಟಿ ರೂ. ಸಂಗ್ರಹವಾಗಿದೆ. ಕಳೆದ ಆರು ದಿನಗಳಲ್ಲಿ ಒಟ್ಟು 1,00,472 ಭಕ್ತರು ಕೌಂಟರ್‌ಗಳಲ್ಲಿ ಹಣ ಪಾವತಿಸಿ ವಿಶೇಷ ದರ್ಶನದ ಟಿಕೆಟ್ ಖರೀದಿಸಿದ್ದಾರೆ.
ಟಿಕೆಟ್ ಹಾಗೂ ಲಾಡು ಮಾರಾಟದ ಸಂಪೂರ್ಣ ವಿವರ (ನ. 3, ಮಧ್ಯಾಹ್ನ 1.30 ರವರೆಗೆ):
- 1,000 ರೂ. ಟಿಕೆಟ್: ಒಟ್ಟು 31,785 ಟಿಕೆಟ್‌ಗಳ ಮಾರಾಟದಿಂದ 3,17,85,000 ರೂ. ಸಂಗ್ರಹ.
- 300 ರೂ. ಟಿಕೆಟ್: ಒಟ್ಟು 68,687 ಟಿಕೆಟ್‌ಗಳ ಮಾರಾಟದಿಂದ 2,06,06,100 ರೂ. ಸಂಗ್ರಹ.
- ಲಾಡು ಪ್ರಸಾದ: ಒಟ್ಟು 81,035 ಲಾಡುಗಳ ಮಾರಾಟದಿಂದ 49,01,620 ರೂ. ಸಂಗ್ರಹ.
- ಒಟ್ಟು ಮೊತ್ತ: 5,72,92,720 ರೂ.
ಇದು ಕೇವಲ ಭೌತಿಕವಾಗಿ ಕೌಂಟರ್‌ಗಳಲ್ಲಿ ಮಾರಾಟವಾದ ಟಿಕೆಟ್ ಹಾಗೂ ಲಾಡು ಪ್ರಸಾದದ ಲೆಕ್ಕಾಚಾರವಾಗಿದ್ದು, ಆನ್‌ಲೈನ್ ಟಿಕೆಟ್ ಬುಕಿಂಗ್ ಹಾಗೂ ಹುಂಡಿ ಕಾಣಿಕೆ ಸೇರಿದರೆ ಆದಾಯದ ಮೊತ್ತ ಇನ್ನಷ್ಟು ಏರಿಕೆಯಾಗಲಿದೆ. ನವೆಂಬರ್ 10 ರವರೆಗೆ ಸಾರ್ವಜನಿಕ ದರ್ಶನಕ್ಕೆ ಅವಕಾಶವಿರುವುದರಿಂದ, ಈ ಬಾರಿ ಹಾಸನಾಂಬೆ ದೇಗುಲದ ಆದಾಯ ಸಾರ್ವಕಾಲಿಕ ದಾಖಲೆ ಬರೆಯುವ ನಿರೀಕ್ಷೆಯಿದೆ.
