- ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡರ ಬೆನ್ನೆಲುಬಾಗಿದ್ದ ಪತ್ನಿ ಚನ್ನಮ್ಮ ಅವರ 72 ವರ್ಷಗಳ ಸುದೀರ್ಘ ದಾಂಪತ್ಯದ ಭಾವನಾತ್ಮಕ ಕಥೆ. ಅಧಿಕಾರದ ಆಸೆಯಿಲ್ಲದ ಸರಳ ಜೀವಿಯ ಆದರ್ಶ ಬದುಕಿನ ಸಂಪೂರ್ಣ ವಿವರ ಇಲ್ಲಿದೆ.
ಹಾಸನ|Hassan: ರಾಜಕೀಯದ ಚದುರಂಗದಾಟದಲ್ಲಿ ಏಳು-ಬೀಳುಗಳನ್ನು ಕಂಡು, ದೇಶದ ಅತ್ಯುನ್ನತ ಪ್ರಧಾನಿ ಹುದ್ದೆಯವರೆಗೂ ಏರಿದ ಹೆಚ್.ಡಿ. ದೇವೇಗೌಡರ ಬದುಕಿನ ಹಿಂದಿದ್ದ ಶಕ್ತಿ, ಅವರ ಯಶಸ್ಸಿನ ಮೌನ ಸೂತ್ರಧಾರ ಚನ್ನಮ್ಮ ದೇವೇಗೌಡ ಇನ್ನಿಲ್ಲ. ಕೇವಲ ಒಬ್ಬ ನಾಯಕನ ಪತ್ನಿಯಾಗಿ ಮಾತ್ರವಲ್ಲದೆ, ಒಂದು ಬೃಹತ್ ರಾಜಕೀಯ ಕುಟುಂಬವನ್ನು ಒಗ್ಗಟ್ಟಿನಿಂದ ಮುನ್ನಡೆಸಿದ ಮಾತೃಶ್ರೀಯ ನಿರ್ಗಮನದೊಂದಿಗೆ ದೇವೇಗೌಡರ 72 ವರ್ಷಗಳ ಸುದೀರ್ಘ, ಅನ್ಯೋನ್ಯ ದಾಂಪತ್ಯದ ಪಯಣಕ್ಕೆ ಇಂದು ತೆರೆ ಬಿದ್ದಿದೆ.
1954ರ ಮೇ 25ರಂದು ಬೆಸೆದ ಬಾಂಧವ್ಯ
1954ರ ಮೇ 25 ರಂದು ಹರದನಹಳ್ಳಿಯ ಈ ಯುವ ಜೋಡಿ ಸಪ್ತಪದಿ ತುಳಿದಾಗ ದೇವೇಗೌಡರು ಇನ್ನು ರಾಜಕೀಯಕ್ಕೆ ಅಂಬೆಗಾಲಿಡುತ್ತಿದ್ದ ಕಾಲ. ಹಾಸನದ ಹಳ್ಳಿಯೊಂದರ ಕೃಷಿಕ ಕುಟುಂಬದಿಂದ ಬಂದ ಚೆನ್ನಮ್ಮ ಅವರು ದೇವೇಗೌಡರ ಬದುಕಿಗೆ ಹೆಜ್ಜೆಯಿಟ್ಟ ಮೇಲೆಯೇ ಗೌಡರ ರಾಜಕೀಯ ಜೀವನಕ್ಕೆ ಹೊಸ ಕಳೆ ಬಂದಿತು ಎಂಬುದು ಕುಟುಂಬಸ್ಥರ ನಂಬಿಕೆ. ಅಂದಿನಿಂದ ಇಂದಿನವರೆಗೂ, ಅಂದರೆ ಸುಮಾರು ಏಳು ದಶಕಗಳಿಗೂ ಹೆಚ್ಚು ಕಾಲ ಈ ದಂಪತಿಗಳು ಸುಖ-ದುಃಖ, ಕಷ್ಟ-ನಷ್ಟಗಳನ್ನು ಸಮಾನವಾಗಿ ಹಂಚಿಕೊಂಡು ಆದರ್ಶ ದಾಂಪತ್ಯಕ್ಕೆ ಸಾಕ್ಷಿಯಾಗಿದ್ದರು.
ಅಧಿಕಾರದ ಆಸೆ ಇಲ್ಲದ ಸರಳ ಜೀವಿ
ಹೆಚ್.ಡಿ. ದೇವೇಗೌಡರು ಶಾಸಕರಾಗಿ, ಮಂತ್ರಿಯಾಗಿ, ರಾಜ್ಯದ ಮುಖ್ಯಮಂತ್ರಿಯಾಗಿ ಕೊನೆಗೆ ದೇಶದ ಪ್ರಧಾನ ಮಂತ್ರಿಯಾದಾಗಲೂ ಚೆನ್ನಮ್ಮ ಅವರು ಎಂದಿಗೂ ಅಧಿಕಾರದ ಪ್ರಭಾವಲಯಕ್ಕೆ ಹೋದವರಲ್ಲ. ದೆಹಲಿಯ ಪ್ರಧಾನಿ ನಿವಾಸದಲ್ಲಿದ್ದಾಗಲೂ ಅವರ ಸರಳತೆ ಮತ್ತು ಧಾರ್ಮಿಕ ಶ್ರದ್ಧೆ ಬದಲಾಗಲಿಲ್ಲ. ರಾಜಕೀಯದ ಯಾವುದೇ ಚಟುವಟಿಕೆಗಳಲ್ಲಿ ಹಸ್ತಕ್ಷೇಪ ಮಾಡದ ಅವರು, ಗೌಡರಿಗೆ ಮಾನಸಿಕ ನೆಮ್ಮದಿ ನೀಡುವ ತಾಣವಾಗಿದ್ದರು. ದೇಶದ ಪ್ರಧಾನಿಯಾಗಿದ್ದ ಪತಿಗೆ ತಾವೇ ಸ್ವತಃ ಅಡುಗೆ ಮಾಡಿ ಬಡಿಸುತ್ತಿದ್ದ ಅವರ ನಡೆ ಇಡೀ ದೇಶದ ಗಮನ ಸೆಳೆದಿತ್ತು.
ದೇವಸ್ಥಾನಗಳ ಪ್ರದಕ್ಷಿಣೆ ಮತ್ತು ಹರಕೆ
ದೇವೇಗೌಡರಿಗೆ ರಾಜಕೀಯವಾಗಿ ಯಾವುದೇ ಸಂಕಷ್ಟ ಎದುರಾದರೂ ಚೆನ್ನಮ್ಮ ಅವರು ದೇವರ ಮೊರೆ ಹೋಗುತ್ತಿದ್ದರು. ಪತಿಯ ಆರೋಗ್ಯ, ಆಯುಷ್ಯ ಹಾಗೂ ಯಶಸ್ಸಿಗಾಗಿ ಅವರು ದೇಶದ ನೂರಾರು ಪುಣ್ಯಕ್ಷೇತ್ರಗಳಿಗೆ ಭೇಟಿ ನೀಡಿ ವಿಶೇಷ ಪೂಜೆ ಸಲ್ಲಿಸುತ್ತಿದ್ದರು. ದೇವೇಗೌಡರು ಕೂಡ ಪತ್ನಿಯ ಧಾರ್ಮಿಕ ನಂಬಿಕೆಗೆ ಸದಾ ಗೌರವ ನೀಡುತ್ತಾ, ಎಲ್ಲೇ ಹೋದರೂ ಅವರ ಕೈ ಹಿಡಿದು ಜೊತೆಯಾಗಿ ಸಾಗುತ್ತಿದ್ದರು. ಇತ್ತೀಚಿನ ವರ್ಷಗಳಲ್ಲಿ ವಯೋಸಹಜ ಕಾಯಿಲೆಗಳಿಂದ ಇಬ್ಬರೂ ಬಳಲುತ್ತಿದ್ದಾಗಲೂ ಒಬ್ಬರಿಗೊಬ್ಬರು ಧೈರ್ಯ ತುಂಬುತ್ತಾ ಬದುಕಿನ ದಾರಿಯಲ್ಲಿ ಸಾಗಿದ್ದರು.
ಒಂದು ಹೆಮ್ಮರವನ್ನು ಸಲಹಿದ ತಾಯಿ
ನಾಲ್ಕು ಗಂಡು ಮಕ್ಕಳು ಹಾಗೂ ಇಬ್ಬರು ಹೆಣ್ಣು ಮಕ್ಕಳನ್ನು ಶಿಸ್ತಿನಿಂದ ಬೆಳೆಸಿ, ಇಂದು ಇಡೀ ಕುಟುಂಬವೇ ರಾಜ್ಯ ರಾಜಕೀಯದಲ್ಲಿ ಭದ್ರವಾಗಿ ನೆಲೆಯೂರಲು ಚೆನ್ನಮ್ಮ ಅವರ ಒಳಗಣ್ಣಿನ ಮಾರ್ಗದರ್ಶನವೇ ಕಾರಣ. ರಾಜಕೀಯ ಒತ್ತಡಗಳ ನಡುವೆ ದೇವೇಗೌಡರು ಮನೆ ಕಡೆ ಗಮನ ಹರಿಸಲು ಸಾಧ್ಯವಾಗದ ದಿನಗಳಲ್ಲಿ ಇಡೀ ಸಂಸಾರದ ಜವಾಬ್ದಾರಿಯನ್ನು ಹೊತ್ತು ಹೆಮ್ಮರವನ್ನು ಸಲಹಿದ ಕೀರ್ತಿ ಚನ್ನಮ್ಮ ಅವರಿಗೆ ಸಲ್ಲುತ್ತದೆ.
ಇಂದು ಚನ್ನಮ್ಮ ಅವರ ಅಗಲಿಕೆಯಿಂದ ಇಡೀ ದೊಡ್ಡಗೌಡರ ಕುಟುಂಬ ಅನಾಥ ಪ್ರಜ್ಞೆ ಎದುರಿಸುತ್ತಿದ್ದರೆ, ಮುಪ್ಪಿನ ವಯಸ್ಸಿನಲ್ಲಿ ಹೆಗಲಿಗೆ ಹೆಗಲಾಗಿ ನಿಂತಿದ್ದ ಪ್ರೀತಿಯ ಅರ್ಧಾಂಗಿಯನ್ನು ಕಳೆದುಕೊಂಡು ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡರು ಏಕಾಂಗಿಯಾಗಿದ್ದಾರೆ. ಈ ಅನ್ಯೋನ್ಯ ದಾಂಪತ್ಯದ ಅಗಲಿಕೆ ಕೇವಲ ಒಂದು ಕುಟುಂಬದ ನಷ್ಟವಲ್ಲ, ಆದರ್ಶ ದಾಂಪತ್ಯಕ್ಕೆ ಸಾಕ್ಷಿಯಾಗಿದ್ದ ಮಹಾ ಕೊಂಡಿಯೊಂದು ಕಳಚಿದಂತಾಗಿದೆ.
