ಹಾಸನ: ಕರ್ನಾಟಕದ ಚಿತ್ರಕಲಾ ಕ್ಷೇತ್ರದಲ್ಲಿ ತಮ್ಮದೇ ಆದ ವಿಶಿಷ್ಟ ಕಲಾಶೈಲಿ, ಸೃಜನಶೀಲ ಚಿಂತನೆ ಹಾಗೂ ನಿರಂತರ ಕಲಾಸಾಧನೆಯ ಮೂಲಕ ಗುರುತಿಸಿಕೊಂಡಿರುವ ಹಾಸನದ ಹಿರಿಯ ಚಿತ್ರಕಲಾವಿದ ಬಿ.ಎಸ್. ದೇಸಾಯಿ ಅವರು 2025–26ನೇ ಸಾಲಿನ ಕರ್ನಾಟಕ ಲಲಿತಕಲಾ ಅಕಾಡೆಮಿಯ ಗೌರವ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ.
ಅಕ್ಟೋಬರ್ 30ರಂದು ಗದಗದಲ್ಲಿ ಜಗದ್ಗುರು ಡಾ. ತೋಂಟದ ಸಿದ್ದರಾಮ ಮಹಾಸ್ವಾಮಿಗಳ ಸಾನಿಧ್ಯದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಶಿವರಾಜ್ ತಂಗಡಗಿ ಅವರು ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ.
ಅಮೂರ್ತದಿಂದ ಮೂರ್ತಕ್ಕೆ ಕಲಾ ಪಯಣ:
ಬಿ.ಎಸ್. ದೇಸಾಯಿ ಅವರ ಕಲಾಕೃತಿಗಳಲ್ಲಿ “ಅಮೂರ್ತದಿಂದ ಮೂರ್ತದ ಪಯಣ” ಮತ್ತು “ಮೂರ್ತದಿಂದ ಅಮೂರ್ತದ ಪಯಣ” ಎಂಬ ವಿಭಿನ್ನ ಚಿಂತನಾ ಪ್ರಕ್ರಿಯೆ ಕಾಣಸಿಗುತ್ತದೆ. ಕಲ್ಪನೆ ಮತ್ತು ಭಾವನೆಗಳಿಂದ ಗುರುತಿಸಬಹುದಾದ ರೂಪವೊಂದನ್ನು ಕಟ್ಟಿಕೊಡುವುದು ಹಾಗೂ ವಾಸ್ತವಿಕ ರೂಪವೊಂದರ ಆಚೆಗಿನ ಅಂತರಂಗದ ಭಾವಗಳನ್ನು ಬಣ್ಣ-ರೇಖೆಗಳ ಮೂಲಕ ಅಭಿವ್ಯಕ್ತಪಡಿಸುವ ಅವರ ಶೈಲಿ ರಾಜ್ಯ ಹಾಗೂ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದೆ.
ಕಲಾಶಿಕ್ಷಣ ಹಾಗೂ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್:
ಕಲಾವಿದರಾಗಿ ಮಾತ್ರವಲ್ಲದೆ ಕಲಾಶಿಕ್ಷಕರಾಗಿಯೂ ಸೇವೆ ಸಲ್ಲಿಸುತ್ತಿರುವ ದೇಸಾಯಿ ಅವರು, ಕಲೆಯನ್ನು ತರಗತಿಯ ನಾಲ್ಕು ಗೋಡೆಗಳಿಂದ ಹೊರತಂದು ಸಾರ್ವಜನಿಕ ಜೀವನದ ಭಾಗವಾಗಿಸಿದ್ದಾರೆ. ತಮ್ಮ ವಿದ್ಯಾರ್ಥಿಗಳನ್ನು ಒಳಗೊಂಡು ರಾಜ್ಯದ ವಿವಿಧೆಡೆ ಕಡಿಮೆ ಸಮಯದಲ್ಲಿ ಬೃಹತ್ ಗಾತ್ರದ ಕಲಾಕೃತಿಗಳನ್ನು ರಚಿಸುವ ಮೂಲಕ ‘ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್’ನಲ್ಲಿ ದಾಖಲೆ ನಿರ್ಮಿಸಿದ್ದಾರೆ.
ಇದರೊಂದಿಗೆ ಪಕ್ಷಿ ಛಾಯಾಗ್ರಹಣದ ಮೂಲಕ ಜೀವವೈವಿಧ್ಯ ದಾಖಲಿಸುತ್ತಾ ಪರಿಸರ ಸಂರಕ್ಷಣೆಯ ಜಾಗೃತಿಯನ್ನೂ ಮೂಡಿಸುತ್ತಿದ್ದಾರೆ. ಇವರ ಈ ಬಹುಮುಖ ಕಲಾಸೇವೆಗೆ ಸಂದ ಅಕಾಡೆಮಿ ಗೌರವವು ಹಾಸನ ಜಿಲ್ಲೆ ಹಾಗೂ ರಾಜ್ಯದ ಕಲಾ ವಲಯಕ್ಕೆ ಹೆಮ್ಮೆಯ ಸಂಗತಿಯಾಗಿದೆ.
